KOMBATE VIOLÉNSIA HASORU FETO

KOMBATE VIOLÉNSIA HASORU FETO

Juvita Pereira Faria

Ohin loron iha mundial osan sai factor esensial ba moris, iha mundial kuaze 90% populasaun fiar katak; osan mak bele lori hamnasa, osan mak bele resolve buat hotu-hotu. Ema baluk seluk fiar katak se sira iha osan barak sira nia moris sei la iha violensia. Ema fo sala ba kondisaun ekonomia hodi sai oportunidade ba sira atu halo violénsia kontra feto. Perguntas mosu iha hau nia hanoin, sé osan bele halakon ou hamenus violénsia tamba sá ema riku tenke halo krime, tamba sá ema riku tenke tama prizaun, tamba sá ema riku halo violénsia hasoru sira feto, at liu tan ema riku sira halo violénsia hasoru sira nia oan ( kazu incestu).

Ita koalia konaba hasa’e ekonomia feto hodi hapara violénsia hasoru feto ne’e sei la sai sasukat ka barometru ida ba maluk mane sira atu hapara violénsia ba feto, atu konsiente katak violensia ne’e krime. Tamba violénsia nia abut laos deit tamba ekonomia fraku, violensia nia abut laos deit konaba osan, laos deit mos konaba edukasaun, laos deit mos konaba pozisaun.

Maibe sosiedade normaliza ona katak mane ka laen baku fen iha uma laran ne’e bikan ho kanuru baku malu, ne’e familia nia problema. Violensia doméstika ne’e krimu publiku iha Timor Leste tamba sá ne’e familia nia problema deit? Ne’e krime. Feto labele ona atu fó oportunidade ba mane atu pratika violensia, labele fó sala ba ita nia a’an wainhira osan la sufisiete iha uma laran akontese violénsia, labele normaliza katak mane baku feto ne’e tamba feto la tein no ida ne’e normal.

Problema violénsia doméstika akontese tamba ema maioria iha sosiedade Timor normaliza katak mane mak iha forsa no iha poder. Mane iha direitu atu baku feto wainhira la tein, la fase roupa.

Tamba ne’e hau enkoraja maluk feto sira atu serbisu maka’as no deskobre ita nia a’an no ita nia abilidade atu kontinua desenvolve ita nia skill sira hodi bele kontribui finanseiru iha familia nia laran MAIBE importante tebes katak ita hamrik iha prinsipiu ida ne’ebe hatudu ba ema hotu no ita nia parseiru katak hau feto, hau merese ba domin, hau merese ba dame, hau merese ba moris ho ksolok tamba hau ema  kriatura especial husi Maromak. Wainhira hau halo sala hau merese o fo hatene no dehan ba hau no kurije hau, laos atu baku.

Hau enkoraja ba maluk feto sira atu hatudu ba mundu katak feto bele laos feto mos bele no merese ba respeitu, domin, dame no ksolok.  Razaun lubun atu haforsa, FETO BELE husi inísiu no konsegue existe to’o mundu nia rohan. Feto BELE tahan domin iha relasaun ida ne’ebe nakonu ho dezafius, Feto BELE foti desizaun atu harí familia ida ho mane ida, Feto BELE atu produz ema ida mai iha mundu, feto BELE kous ema ida hodi koñese mundu, feto BELE atu sustenta família iha tempu hotu-hotu, feto BELE finansia nia família, Feto BELE apoiu Finanseiru ba nia oan sira nia edukasaun, Feto BELE apoiu moral ba oan sira atu sai matenek, feto BELE atu eduka nia oan ba moris iha sosiedade, feto BELE hanorin nia oan ho domin, Feto BELE ukun nia família ho pasensia no nakonu ho carinho, feto BELE apoiu nia laen iha mundu politiku, feto BELE serbisu iha sosiedade, feto BELE serbisu iha governu, Feto BELE kaer pasta nudar ministra, Feto BELE sai deputada iha Parlamentu, feto sei BELE sai Presidente da Repúblika. Iha prinsípiu feto maka kous Presidente da Repúblika, Feto mak transfere koñesimentu ne’ebe nakonu ho sabedoria ba lideransa nasaun sira hotu-hotu iha mundu rai klaran. Desenvolvimentu umanu nia abut lolos mai husi feto, lia murak motivasaun, lia murak apoiu moral, lia murak domin, lia murak sabedoria hahú kedas wainhira inan kous iha kabun, prosesu desenvolvimetu lideransa hahú husi inan nia atetudi no edukasaun iha prosesu kresimentu lideransa ida.

Tamba sá maluk mane sira la konsiente abilidade sira ne’e? Tambasá fó sala ba feto wainhira hamlaha? Tamba sá halo violénsia hasoru feto? Tambasá la tulun no kompleta malu? Tamba sá tenke hein ba feto? Feto merese atu hadomi laos atu baku!

Tamba ne’e, ho esperansa bo’ot hein katak maluk mane sira hotu bele kontinua fó apoiu moral, kontinua motiva maluk feto sira atu bele expresa sira nia a’an iha sosiedade ho sira nia sabedoria ne’ebe nakonu ho domin.

Mane Timor Leste sei bele sai heroi ba feto Timor Leste nia desemvolvimentu. Wainhira ita bo’ot sira komunga katak  violénsia ne’e krime.

Abrasu

JPF