Tamba sa Egoista?

TAMBASÁ EGOISTA?

‘’Habelun malu ho mundu’’ ‘’Politiza ema barak nia moris diak tamba kanten ba rikusoin mundu nian!

Hahú husi fulan Outubru  to’o Novembru tinan 2017, husi lorosa’e to’o loromonu, tasi feto to’o tasi mane, husi komunidade ida ba komunidade seluk, husi Bairo ida ba  bairo ida seluk, grupu ida ba grupu seluk, joventude sira tantu labarik sira iha sosiedade Timor Leste konsegue kontribui paz no estabilidade iha prosesu eleisaun hotu-hotu ba VII governu konstituisional ho maduru tebes. Parabéns ba povu maubere!.

Lia anin husi lorosa’e to’o loromonu, husi tasi feto to’o tasi mane, husi enklave Oe-cusse to’o ilha Jaco hasoru malu iha cidade Díli hakilar ho lian maka’as hodi husu ba uma lisan, uma abut, uma domin, uma salvasaun ba moris diak povu maubere UMA FUKUN PARLAMENTU NASIONAL ne’ebe hamahon lideres intelectuais rai Lulik RDTL hodi tane a’as komunikasaun no negosiasaun ba programa VII governu konstituisional hodi responde ba povu maubere nia ezijensia prinsipal atu moris hakmatek ho moris ekonomia ne’ebe  adekuadu.

Mesmu nune’e, ho laran nakali, ami matan fihir kona karakter egoista ba pozisaun, ami matan hateke kona karakter barullhu hodi hakarak sobu deit no la iha interese atu kontribui, ami matan fihir kona liman foer no taukten sira, ami tilun rona lian sira dehan ‘’ami nia tempu ona atu goza lai’’ balun seluk hateten’’tinan lima deit ne’e husik ami aproveita lai’’. Hey maluk Timor oan hotu, ó ne’e sé, ami ne’e se, sira ne’e sé? Se mak atu aproveita sé? Se mak atu vitima ba sé? Tansa ó lahateke ó nia maluk ida ne’ebe la iha paun fuan ida atu han iha dadersan enkuantu ó iha paun naresin iha ó nia meza? Tamba sa, ó labele sente kosar ne’ebe sira hikis, tambasa ó nia oan hatene lê iha dalen oin-oin no labarik Timor oan lubun ne’ebe la hatene lê no hakerek iha dalen Tetun rasik no ó la importa? Tambasa imi kontinua dehan ‘’labarik mak futuru Timor Leste, joven mak aliserse ba Timor Leste nia desenvolvimentu’’, enkuantu ó la iha inisitiva atu estuda no forma plataforma ida diak no adekuadu atu deskuti no fo solusaun maibe ó gosta tebes foti ó nia an nudar ema bo’ot, matenek no hadomi krítika maibe la iha kualidade atu solusiona problema. Laos tempu ona atu ita krítika no hatudu liman ba malu atu dehan ó la bele, maibe tempu ba Timor oan hotu-hotu atu lidera malu, tulun malu, kontinua hametin unidade nasional nune’e mak ita hotu bele konsumu dame, hakmatek no domin iha ita nia rain.

Ami la kestiona kualidade matenek ne’ebe ita bo’ot sira iha, ami la iha teoria barak hanesan ita bo’ot sira estuda iha rai hotu-horu iha mundial ne’e, ami la iha livru barak konaba polítika, ekonomia ka sosial hanesan ita bo’ot sira iha tamba ami ema laek, maibe ami iha deit livru ida atu haforsa ita bo’ot sira nia siênsia. Reflesaun karakter mak tópiku ida interesante haktuir Biblia iha Mateus 4; 1-2 (‘’Tambasa iha funu? Tambasa iha istori malu entre imi? Laos katak mai husi imi nia hanoin at ne’ebe domina iha imi nia isin? Imi hakarak buat ida maibe imi lahetan nune’e imi oho, imi laran moras. Imi la konsegue hetan buat ne’ebe imi hakarak tamba ne’e imi hirus no imi baku malu’’).

Lia murak sagradu ida ne’e bolu ema hotu ne’ebe horik an iha mahon RDTL atu lidera ho fuan mos ho atenbrani hodi luta ba povu maubere nia moris diak hodi la sai naukten ne’ebe aproveita ne’ebe kanten ba rikusoin mundu nian, kanten ba naran bo’ot no kanten ba pozisaun. Husik ita nia fuan mak kontrola ita nia an no laos ita nia kakutak mak kontrola ita. Basá ita isin nia folin hanesan rai rahun ne’ebe ema sei la bele hola basá la iha valor, ita nia kakutak sei la iha folin basá nia sei sai ruin no ikus mai sei sai rai rahun, maibe ita nia fuan ne’ebe mos no laran ne’ebe diak sei hasantu ita nia klamar no sei fó folin ba ita nia moris iha mundu eternal basá ita fó ksolok ba ema seluk no fó moris diak ba ema seluk.

Ami lian bolu Timor oan hotu-hotu, Joven feto no mane, maubere no buibere sira hotu, atu furak liu tan katak ita hotu tenke konsiente ho neon ida laran ida atu sai radikal ba desenvolvimentu, radikal ba ema hotu nia moris diak no Laos radikal ba nukleo ida no laos mos ba ita rasik nia an. 

Let your heart not be troubled by your mind!

Let your heart not be troubled by your wrong thinking

Let your heart not be easily distracted by the power of politics!

Let your heart be filled with loyality, honesty, transparency and with LOVE!

Abrasu 

#JPF