Feto Mak Kous Lideransa

Feto iha lideransa

‘’Feto mak kous lideransa’’ - Juvita Pereira Faria

                                                                                                                        Dili, 14 de Augusto 2018 

Iha lokraik ida, loron matan monu dadaun hein atu fulan nia roman mosu hodi hafalun domin inan nian ne’ebe klean hanesan tasi no as hanesan lalehan iha kalan furak ne’e. Domin wa’in husi inan nasulin maka’as ba oan feto no mane iha kalan ne’e akompanha ho lia murak dadolin hateten ‘’ oan, inan hadomi imi, domin ne’e labele atu deskreve no susar atu hateten, ohin ó monu karik hau iha ne’e atu kous fali, aban ó monu fali hau sei iha ba ó ho hakuak ida, wainhira ó bo’ot ona ó sei responsabiliza ba ó nia an, hodi hatutan domin ne’e ba ó nia familia, kolega no ema hotu ne’ebe besik ó’’.  Inan kontinua ho lia murak motivasaun iha dader kmanek ida wainhira loron matan hahú mosu husi loron lorosa’e ho nia roman furak ne’ebe forte nune’e hafurak foho no cidade Díli nia paijazen iha dadersan ne’e hodi hateten ‘’ oan, hahan dader pronto ona, mai konsumu hodi fo forsa ba ó isin atu ó sai forte liu tan, husik ó an atu sai bensaun  ba ema seluk, sai forsa ba ema seluk wainhira sira preciza, matenek bá hodi sai fontes moris diak ba ema barak ne’ebe sei preciza ó nia tulun, sai oan ne’ebe diak, maun ne’ebe lori domin ba ema barak atu loron ida ó bele sai aman ba ó nia oan sira ho domin bo’ot ne’ebe klean hanesan tasi no as hanesan Lalehan’’.

Sira hamnasa Ho lian maka’as,’’ hahahahaha ‘’, sira hakilar ho basa liman maka’as tebes hodi dehan FETO MOS BELE! FETO MOS BELE!. Ho laran susar feto hanoin ‘’hmmm deskriminasaun mosu ona entre feto no mane, tambasa?’’.

Tamba sa la esklui tiha liafuan MOS (Feto mos bele ba feto BELE). Razaun lubun atu haforsa; FETO BELE husi inísiu no konsegue existe to’o mundu nia rohan. Feto BELE tahan domin iha relasaun ida ne’ebe nakonu ho dezafius, Feto BELE foti desizaun atu harí familia ida ho mane ida, Feto BELE atu produz ema ida mai iha mundu, feto BELE kous ema ida hodi koñese mundu, feto BELE atu sustenta família iha tempu hotu-hotu, feto BELE finansia nia família, Feto BELE apoiu Finanseiru ba nia oan sira nia edukasaun, Feto BELE apoiu moral ba oan sira atu sai matenek, feto BELE atu eduka nia oan ba moris iha sosiedade, feto BELE hanorin nia oan ho domin, Feto BELE ukun nia família ho pasensia no nakonu ho carinho, feto BELE apoiu nia laen iha mundu politiku, feto BELE serbisu iha sosiedade, feto BELE serbisu iha governu, Feto BELE kaer pasta nudar ministra, Feto BELE sai deputada iha Parlamentu, feto sei BELE sai Presidente da Repúblika. Iha prinsípiu feto maka kous Presidente da Repúblika, Feto mak transfere koñesimentu ne’ebe nakonu ho sabedoria ba lideransa nasaun sira hotu-hotu iha mundu rai klaran. Desenvolvimentu umanu nia abut lolos mai husi feto, lia murak motivasaun, lia murak apoiu moral, lia murak domin, lia murak sabedoria hahú kedas wainhira inan kous iha kabun, prosesu desenvolvimetu lideransa hahú husi inan nia atetudi no edukasaun iha prosesu kresimentu lideransa ida.

Hakerek na’in la tesi lia hasoru maluk mane sira, maibe hakarak atu ilustra ba mundu katak involvimentu feto iha mundu polítika, ekonimia, social, cultural, relijioza sai factor importante atu atinje moris ne’ebe tranquilllu,equilibriu, nakonu ho paz, dame no domin iha sosiedade ida nia laran. Razaun principal ne’ebe feto lideransa iha no maioria mane iha lideransa la iha tamba Feto uza fuan no kakutak atu lidera no foti desizaun no maioria mane uza hanoin ka kakutak deit hodi julga ka foti desizaun.

Ho esperansa bo’ot hein katak maluk sira hotu bele kontinua fó apoiu moral, kontinua motiva maluk feto sira atu bele expresa sira nia an iha sosiedade ho sira nia sabedoria ne’ebe nakonu ho domin. Mane Timor Leste sei bele sai heroi ba feto Timor Leste nia desemvolvimentu.

Obrigada ba Le nain sira hotu! 

Abrasu

JPF